Yangiliklar

O‘zbekistonda to‘rt va besh qavatli uylarga liftlar o‘rnatish rejalashtirilmoqda

O‘zbekistonda besh qavatgacha bo‘lgan turar joy binolariga liftlar o‘rnatish bo‘yicha dastur ishlab chiqilmoqda. Bu haqda 8-iyul kuni Axborot va ommaviy kommunikatsiyalar agentligida o‘tkazilgan matbuot anjumanida Qurilish va kommunal xo‘jaligi vazirligi vakillari jurnalistlar savollariga javoban ma’lum qildi.

Vazirlik boshqarmasi boshlig‘i Aziz Xalilovning taʼkidlashicha, mamlakat bo‘yicha 14 637 ta to‘rt qavatli va 7 541 ta besh qavatli uy mavjud. Uning aytishicha, vazirlik mutaxassislari xorij tajribasini o‘rgangan, xususan, Avstriya, Germaniya, Finlyandiya va Estoniyada shunday binolarga allaqachon liftlar o‘rnatilmoqda.

Vazir o‘rinbosari Ozoda Jo‘rayeva aholidan, ayniqsa nogironligi bo‘lgan fuqarolardan tushgan murojaatlar mazkur dasturni ishlab chiqishga turtki bo‘lganini tasdiqladi.

Shuningdek, Xalilov avval past qavatli uylar uchun lift o‘rnatishdan oldin, balandroq binolardagi mavjud liftlar muammosini hal qilish zarurligini qo‘shimcha qildi. 5 491 ko‘p kvartirali uyni qamrab olgan inventarizatsiyaga ko‘ra, mavjud 13 798 ta liftning 2 001 tasining xizmat muddati allaqachon tugagan, yana 382 tasi esa ta’mirga muhtoj.

Avvalroq xabar berilganidek, ushbu liftlarni almashtirish va ta’mirlash uchun mahalliy byudjetlardan 854,6 milliard so‘m ajratilishi rejalashtirilgan.

Faqat shundan so‘ng besh qavatgacha bo‘lgan uylarga yangi liftlar o‘rnatish dasturining amalga oshirilishi boshlanadi.

Manba